الجمعة، 27 يناير 2012

انهرده في يوم خمسه وعشرين

أنهرده في يوم خمسه وعشرين

عيد ثورتك يابلادي
انهرده في يوم خمسه وعشرين
شايفه الفرحه ماليه كل جبين
والناس كلها فخورة بثوره اذهلت ملايين
****************************** 
 
لكن انا مش قادره انسى اتنين
محمد ومينا كانو شابين
رجاله قوي جامدين
واصحاب من زمان وكل اللي يشوفهم يقول توأمين
طلعو مع اصحابهم يوم خمسه وعشرين
شايلين علمك يابلدي فوق الرأس وبين العينين
نده عليهم عم حسين
رايحين فين ياشباب بيقولو زحمه في الشوارع
وناس صايعه في الميادين
**************************************

وقف محمد ومينا وبصو لعم حسين
ياراجل ياطيب متصدقش كل اللي يتقال ياعم حسين
دول شباب رجاله قوي واعيين
واقفين صامدين عشان حقك وحقي ياعم حسين
عشان بلدنا ترجع لولادها التعبانين
من ايد عصابه نهبت خيرها سنين
احنا كمان على ميدان التحرير رايحين
ادعيلنا قوي ياعم حسين
********************************** 
 
رفع ايده وقال ربنامعاكو ياولادي ومع كل المصريين
وصل محمد ومينا لميدان التحرير
شافو هناك احمد واخته ياسمين
ومعاهم اصحابهم في الجامعه والكل معتصمين
بينادو باسمك يابلادي تعيشى حره ابيه
وبكل سلام متجمعين
************************************

فجأه في عز لمتنا  وفرحتنا الجو ملاها الانين
لقينا احمد وقع وبتصرخ اخته ياسمين
والناس بتجري والرصاص بيطير فوق روؤسنا
وفي العينين
وايد محمد رخت من ايدك يامينا
وقع محمد والناس بتشدك يامينا
وانت بتصرخ بصوت عالي حزين
محمد مات ياجماعه ده محمد ده صاحبي من سنين
اه عليك ياخوي يانور القلب وضي العين 
********************************************** 
 
طب اقول ايه لولاد حتتي ولعم حسين
رحت يامحمد ومعاك زينه شباب المصريين
بدمهم انهرده احنا لسه عايشين
وعشانهم الكل اليوم متجمعين
هناك في ميدان التحرير واقفين
واقف مينا وكمان معاه عم حسين
شايلين صورتك يامحمد فوق الجبين
عايزين حقك يامحمدأنهرده 
 
في يوم خمسه وعشرين

ليست هناك تعليقات:

إرسال تعليق